كئيبه ليلة البارح توارت بإنكسار اثنين
انا والقلب من غلطه ماهي من ضمن غلطاتي
عبث منها بدون اسباب تشلع مهجتي نصفين
وانا في عشقها حتى حرمت العين غفواتي
رجاء لا تشيلين العتب كان الهدف حرفين
اذا ما تعرفيها مو خطايه اسمعي الاتي
على ذاك الطريق المنتمي للشك والتخمين
مشيت وياكثر ما بعثرت فالناس نظراتي
اناظر في الوجوه والملامح طيب وبعدين
انا من وين الاقي لك طريق يحث خطواتي
اقول هناك لا يمكن هنا يمكن هناك تبين
شعاع الضي واشراق الامل وتلملم شتاتي
رسمتك حلم غايب عن حياتي من يجي عامين
لقيتك علم وايدينك تعطر كل صفحاتي
وجيت انثر لك احساسي وشوقي واحتراقي لين
تركتك في وضوح تشوف حزني وانكساراتي
ابيك تحس في همي وتلمس رعشة الكفين
ابيك تحس في وجدي عليك وجمر زفراتي
لاني كنت احسب الحظ مثل سهيل للسارين
سريت ولا لقيت سهيل في كل اتجاهاتي
لقيتك للأسف جامد ولا تدري وصلت منين
وقسوة قلبك اسقتني جفاك المجحف العاتي
فمان الله برحل والجروح تعانق السكين
بسافر بالالم من شان ما ارضخ لاجل رغباتي
ابرحل عنك واترك لك حكايه داخل القوسين
تمتع بعدها باللي تطوله من معاناتي
مصير الشوق يعثى في حنايا مهجتك وتلين
بوقت فيه يا بعدي عليك وصعب جياتي
انا يوم اشتكيت من الولع ومن السهر والبين
ظننت انك تحس بثورة اوجاعي ولوعاتي
اثار الشوق ما يرحم ونار الصد عن نارين
كواني جمرها الحارق وانا في غمرة اسكاتي
عشان اني صبرت اتزيد في الحشا جرحين
وانا ما كنت اظن الصبر يخلف فيك هقواتي
ابصبر لين يشكي الصبر من صبري وبصبر زين
و اروح بعيد وادفن صرخة احزاني وآهاتي
على الله والجروح اللي بقلبي عن ثلاث سنين
عسى ربي يخفف نزفها وتجف دمعاتي
ولكن لو تلاقينا وخانتني دموع العين
ترى ماهو بكا هذا عتب ذاتي على ذاتي
