اطلالة اولى.....

هذه اول مشاركة لي بالمنتدى وان شاء الله انها تكون بداية موفقة واعذرونا على التقصير مقدما...

القصيدة عبارة عن كلمات بسيطة ومتواضعه جدا كتبتها قبل خمسة اشهر واصفا للاحداث الجاريه في العالم العربي من ثورات واحداث اقول فيها:

البارحه ليلي مضى فيه كله
حال العرب لابد افنده تفنيد

ياصاحبي ودي على الكيف دله
ريحة نسمها يارفيقي على الميد

اليوم قاريلي مقال بمجلة
عن اللذي ضحوه كبش(ن)على العيد

ياليت فاله لو بيدي احله
على اللذي يطغون من غير تحديد

وصل على الباغي سلامي وقله
تونس ابيه ياعديد المناقيد

ياللي سرقت العز والمال كله
شالوه تاجك وابدلو تاجك بقيد

كلن على فعله يحدد محله
واللي زرعته بالكيد تحصده بالكيد

اعطاك عمك من كرم فيه فله
ولو هي على الهقوات مسكنك بالبيد

واللي طغى بشعبه وشعبه يجله
مافاد نصحه ولانفع فيه تنديد

سبحان نفسي قال انا صرت مله
قولة فعل ماقال بلسان ترديد

ماهي غربيه دام فرعون خله
ماقول شافه بس نافسه تمديد

صارت مصر جدبه وحكمه مظلة
منع مطرها عند ثم زاد تعنيد

واليوم نقرا و الحشا فيه عله
الفين ماتوا والعدد فيه تجديد

زنقة وزنقه قام يصايح بغله
صارت اغاني وطوروها اناشيد

لاتحسب الله غافل(ن)عنك لله
ماصاب غيرك صايبك ياعريبيد

وان طال عمرك لك طريق(ن)تدله
ماينفعك شي(ن)سوى قول توحيد

من سل سيفه ظلم يارب شله
على عبادك شل واللام توكيد

هذا كلامي وان حصل فيه زله
المغفره والصفح من طبع الاجاويد


..اخوكم فهد الشريف

أبيات بداخل شاعر يحمل بداخله ثقل شعري رائع

ماهي غربيه دام فرعون خله
ماقول شافه بس نافسه تمديد

صارت مصر جدبه وحكمه مظلة
منع مطرها عند ثم زاد تعنيد

بدايه جميله يسعدك ربي

الشكر لكم جميعا على ردودكم ووجودي بينكم شرف لي وصحت ابدانكم ولاهنتم..

من سل سيفه ظلم يارب شله
على عبادك شل واللام توكيد

هذا كلامي وان حصل فيه زله
المغفره والصفح من طبع الاجاويد

صدقت يالغلا

سلمتي ولا هانت منطوقك اختي ....

بيض الله وجهك ياصعب المنال ولا هنت على الرد الجميل اخووي...الشرف لي بأنضمامي لأبناء عمومتي.

حياااك الله شرفت

الشرف لي بتعليقك يابن غازي وتسلم ع المرور...

تسلم يالغلا

الله يعطيك العافيه على ردك اختي